Xalq artisti Ağasadıq Gəraybəyli 15 mart 1897-ci ildə Şamaxıda bəy ailəsində doğulub. Atasını erkən itirib, Şamaxı zəlzələsindən sonra isə ailəsi Bakıya köçüb.
Burada orta məktəbi Cəfər Cabbarlı ilə bir sinifdə oxuyub. Məhz o, Gəraybəylini ilk dəfə filmə dəvət edib. İlk səssiz filmlərimizdən biri olan "Sevil"də ona "Balaş" rolunu canlandırmaq həvalə olunub.
Sonralar "Bəxtiyar" filmindəki klub müdiri "Ağabala", "O olmasın, bu olsun" filmində "Rüstəm bəy" obrazı aktyora böyük məşhurluq gətirib.
Ağasadıq Gəraybəyli 72 illik yaradıcılıq dövründə 200-dən artıq obraz canlandırıb. O, Nəriman Nərimanovun "Nadir şah", Üzeyir Hacıbəyovun "Arşın mal alan", Cəfər Cabbarlının "Sevil", "Od gəlini", "1905-ci ildə", sonralar "Vaqif", "Həyat", "On ikinci gecə", "Xanlar" və s. tamaşalarda rol alıb. Xalq artistinin sonuncu rolu "Xurşidbanu Natəvan" tamaşasında yaşlı knyaz obrazı olub.
Ağasadıq Gəraybəyli 1988-ci il dekabrın 5-də Bakı şəhərində vəfat edib.
