Aliyə Allahqulu qızı Ramazanova 7 fevral 1941-ci ildə Qusar rayonunun Piral kəndində anadan olub.
Ramazanova uşaq ikən onun atası İkinci Dünya müharibəsində həlak olub, dörd yaşı tamam olanda isə onun böyük bacısı, sonra isə anası rəhmətə gedib. Buna görə o, Bakının 11 saylı uşaq evində böyüyüb. O, rəqs etməyi sevdiyindən 16 yaşında Dövlət Mahnı və Rəqs Ansamblına işləməyə dəvət alıb.
Aliyə Ramazanova 1958-1982-ci illərdə Azərbaycan Dövlət Akademik Filarmoniyasında Mahnı və Rəqs Ansamblının baş solisti olub. Həmin zaman o, keçmiş SSRİ respublikaları, Pribaltika respublikaları, Avropa, Asiya, Ərəbistan, Afrika, Amerikanın bütün bölgələrində qastrol səfərlərində çıxış edib.
1982-ci ildən Aliyə Ramazanova Dövlət Mahnı və Rəqs Ansamblında “Sevinc”, Şəhriyar adına mədəniyyət ocağında “Zəriflik”, indiki Tofiq İsmayılov adına Uşaq-Gənclər Yaradıcılıq Sarayında “Cücələrim”, “Çiçəklər” ansambllarının yaradıcısı olub.
Ramazanovanın yaratdığı “Vağzalı-Mirzeyi”, “Tərəkəmə”, “Ağ çiçək”, “İnnabı”, “Ceyran”, “Qara tellər”, “Nazlana-nazlana”, “Dağlar gözəli”, “Uzundərə”, “Sarı gəlin” və digər rəqslər rəqqaslıq sənətinin nümunələri sayılır. O, 1982-ci ildə Azərbaycan SSR-in Əməkdar artisti adına layiq görülüb.
Aliyə Ramazanova 1 sentyabr 2023-cü ildə vəfat edib. O, Yasamal qəbiristanlığında dəfn olunub.
İstinad edilən mənbələr:
