Bu gün Qubanın fəxri tarixçisi İlyas Babayevin doğum günüdür

İlyas Atababa oğlu Babayev 23 mart 1935-ci ildə Quba rayonunun Xanəgah kəndində anadan olub.

İlyas Babayev Qafqaz Albaniyası dövlətinin yaranması tarixini tədqiq etmişdir. O, 270-dən artıq elmi əsərin müəllifidir. 80-dən çox elmi mə­qa­ləsi xarici ölkələr­də nəşr olunmuşdur. İlyas Babayev ali və orta məktəb dərsliklərinin, çoxcildlik “Azərbaycan tarixinin” I-II cildlərinin, “Azərbaycan numizmatikası”nın I cildinin, çoxcildlik “Azərbaycan Ensiklopediyası”nın, “Naxçıvan Ensiklopediyası”nın müəlliflərindən biridir.

Tarixçi 1941-1948-ci illərdə Xanəgah kənd məktəbində, 1949-1952-ci illərdə isə Quba rayonunun Rustov kənd orta məktəbində oxuyub. O, 1953-1958-ci illərdə indiki Bakı Dövlət Universitetinin tarix fakültəsində təhsil alıb.

İlyas 1959-1990-cı illərdə Qəbələ arxeoloji ekspedisiyasının təşkilatçılarından və iştirakçılarından biri olmuşdur. O, 1965-ci ildə Azərbaycan SSR EA Tarix İnstitutunun Arxeologiya şöbəsinin baş laborantı idi.

İlyas 1987-ci ildən Azərbaycan SSR EA Tarix İnstitutunun Antik dövr arxeologiyası şöbəsinin müdiri seçilmişdir. O, 1997-ci ildən Bakı Dövlət Universitetinin nəşr etdiyi “Tarix və onun problemləri” jurnalının Redaksiya Şurasının üzvü olub.

Professor 2001-2010-cu illərdə Azərbaycan Respublikası Prezidenti yanında Ali Attestasiya Komissiyasında tarix ixtisası üzrə Ekspert Şurasının üzvü idi.

O, 2002-ci ildən AMEA-nın Arxeologiya və Etnoqrafiya İnstitutunun “Antik dövr arxeologiyası” şöbəsinin müdiri vəzifəsində çalışmışdır. İlyas 2005-ci ildən Koreya arxeoloqları ilə birlikdə fəaliyyət göstərən Qəbələ arxeoloji ekspedisiyasına rəhbərlik etmişdir.

Tarixçi 2006-2007-ci illərdə “Azərbaycan arxeologiyası” jurnalının Redaksiya Şurasının üzvü seçilmişdir. 2007-ci ildə AMEA-nın müxbir üzvü seçilmişdir.

O, 2007-2009-cu illərdə Macarıstanın Budapeşt şəhərində keçirilən beynəlxalq elmi konfranslarda iştirak edərək Azərbaycanın qədim tarixi və arxeoloji abidələri haqqında məruzələr etmişdir.

Alim 2010-cu ildən “Azərbaycan Milli Elmlər Akademiyasının Xəbərləri” (tarix, fəlsəfə və hüquq seriyası) jurnalının Redaksiya Şurasının üzvü olmuşdur. 2011-ci ildən o, Milli Azərbaycan Tarixi Muzeyinin “Elmi Əsərlər”i məcmuəsinin Redaksiya Heyətinin üzvü idi.

İlyas 2011-2012-ci illər Azərbaycan Respublikası Prezidenti yanında Ali Attestasiya Kommissiyasında Tarix və Siyasi elmlər üzrə Ekspert Şurasının sədri olmuşdur.

İlyas Babayev 27 dekabr 2017-ci ildə Bakıda vəfat etmişdir.

İstinad edilən mənbələr:

• “Elm”


• qəzeti.- 12 noyabr 2010.


• Quba və qubalılar. Bakı-2012.


• Şahin Fazil. Quba tarixi. Bakı-2016.


• Azərbycan arxeologiyası və etnoqrafiyası. Bakı-2004.


• Azərbycan arxeologiyası və etnoqrafiyası. Bakı-2010.


• https://ilyas-babayev.az/ilyas-atababa-oglu-babayevin-h%c9%99yati-v%c9%99-elmi-pedoqoji-f%c9%99aliyy%c9%99tinin-%c9%99sas-tarixl%c9%99ri/


• http://www.anl.az/down/meqale/xalqqazeti/2015/aprel/427826.htm


• https://science.gov.az/az/forms/skanchavshiesya-chlenyikorrespondentyi/3192


• https://1905.az/ilyas-atababa-oglu-babayev/