Vahid Əhmədov 2 aprel 1947-ci ildə Qubanın Qonaqkənd qəsəbəsində anadan olub. O, qubalı Qaçaq Mayılın nəslindəndir.
Əhmədov 1965-ci ildə Qonaqkənddə orta məktəbi bitirəndən sonra 1965-1971-ci illərdə indiki Azərbaycan Texniki Universitetində mühəndis-energetik ixtisasında təhsil alıb. 1989-1992-ci illərdə Almaniyanın Bonn Menecment İnstitutunda təhsilini davam etdirərək Beynəlxalq dərəcəli menecment-iqtisadçı diplomunu alıb.
Əhmədov 1967-1971-ci illərdə indiki Səttarxan adına Maşınqayırma zavodunda çalışıb. O, 1971-1972-ci illərdə ordu sıralarında xidmət edəndən sonra zavoda qayıdaraq orada İstehsalat şöbəsinin rəisi vəzifəsinə irəli çəkilib. Bir müddət Bakı Radio zavodunda sex rəisi, istehsalat şöbəsinin rəisi vəzifələrində çalışıb və texniki peşə məktəbinin direktoru olub.
1981-ci ildən Bakı Dəzgahqayırma zavodunda baş mühəndis olub. 1983-cü ildən “Bakı fəhləsi” zavodunun direktoru, 1986-cı ildən Keşlə maşınqayırma zavodunun direktoru, 1988-ci ildən “Bakneftmaş” İstehsalat Birliyinin baş direktoru vəzifələrində çalışıb. 1992-1993-cü illərdə Azərbaycan Respublikası Baş nazirinin müavini, birinci müavini olub.
O, 1990-1995-ci illərdə Milli Məclisin deputatı, İqtisadi siyasət Komissiyasının sədri olub. 1991-ci ildə Azərbaycanın Aktının hazırlanmasında iştirak edib.
Əhmədov 2005 və 2010-cu illərdə Milli Məclisə deputat seçilib. Deputat olduğu müddətdə Quba rayonu üçün vacib olan bir çox layihələrin - Quba-Qonaqkənd yolunun çəkilişi, Quba şəhərinin su təchizatı sisteminin yenidən qurulması, yeni məktəb binalarının inşası, kənd sakinlərinin qaza və içməli suya olan tələbatının ödənilməsi, rayonda hava limanının tikintisi və bir çox məsələlərin gündəmə gətirilməsi və icrası işlərində xüsusi xidmətləri olub.
Xeyriyyəçilik fəaliyyətinə görə 2001-ci ildə “Hacı Zeynalabdin Tağıyev mükafatı laureatı” adına layiq görülüb. Həmçinin Azərbaycan Respublikası Ali Sovetinin Fəxri Fərmanı və “Şöhrət” ordeni ilə təltif edilib. Milli Məclisdəki fəaliyyətinə görə dəfələrlə “İlin fəal millət vəkili” adına layiq görülüb.
O, “Sahibkar-menecment” kitabının (1990) və 400-dən çox elmi-kütləvi yazının müəllifidir.
İstinad edilən mənbələr:
