Aydın Çingiz oğlu Qaradağlı 20 avqust 1929-cu ildə Qubada anadan olub.
Shimal.News məlumat verir ki, o, Qaradağ xanlığının (indiki İran ərazisində 1747-1808 illərdə feodal dövlət) xanlarının nəsilindəndir.
Azərbaycanda, diktorlar arasında ilk dəfə olaraq “əməkdar artist” fəxri adına məhz o, layiq görülüb. Heydər Əliyevin xüsusi göstərişi ilə, onun çıxışları efirə yalnız Aydın Qaradağlının səsi ilə verilirdi.
Qaradağlı Azərbaycan radiosunda işə başlayanda 17 yaşı var idi. Onun oğlu “Atam öz sənətini necə seçib” adlı inşasında belə söyləyir:
“O uşaq vaxtı, bütün günü radioqəbuledici yanında olurdu. Görəsən onun içində kim oturub? Danışan kimdir? Bu suallar ona rahatlıq vermirdi… Bir dəfə o, evdə tək olan zaman radionu açıb sökür. Və çox təəsüflənir ki, cihazın içində heç kimi tapmır…”
Aydın 1944-cü ildə orta məktəbi, 1945-ci ildə isə Gəmiçilik məktəbini (indiki Azərbaycan Dövlət Dəniz Akademiyasını) bitirib. 1946-cı ildə Azərbaycan SSR dövlət radiosuna diktor vəzifəsinə işə qəbul olunub. 1948-ci ildə M.F.Axundov adına Azərbaycan Dövlət Teatr məktəbinin aktyorluq ixtisasını, 1949-cu ildə isə Moskvada Ümumittifaq diktorluq kurslarını bitirib. 1951–1954-cü illərdə Sovet Ordusunda xidmət edib.
Azərbaycan radiosunun "Qızıl fond"unda Aydın Qaradağlının ifasında dünya klassiklərinin, o cümlədən, Nizami, Füzuli, Natəvan, Cəfər Cabbarlı, Məhəmmədhüseyn Şəhriyarın, Səməd Vurğun, Süleyman Rüstəm, Rəsul Rza, Hüseyn Arifin əsərlərinin səsyazmaları qorunub saxlanılır.
Qubalı diktor 1980-ci il 28 yanvar tarixində Bakıda vəfat edib.
