Astronom Nadir Baba oğlu İbrahimov 28 dekabr 1932-ci ildə Qubada anadan olub. O, əslən İsmayıllının Lahıc qəsəbəsindən idi. Nadir İbrahimovun şərəfinə Marsda iki krater var.
Nadir İbrahimov 1956-cı ildə indiki Bakı Dövlət Universitetinin fizika fakültəsinə daxil olub. Daha sonra o, Şamaxı Astrofizika Rəsədxanasında çalışıb.
Burada İbrahimov Mars planetinin atmosferinin tədqiqi ilə məşğul olub. İbrahimov, həmçinin Saturn, Venera, Uran və Neptun planetlərinin tədqiqi ilə məşğul olub. Alimin teleskopla çəkdiyi Marsın şəkilləri o dövrün dəyərli nümunələrindən hesab edilir.
1976-cı ildə Mars planetində kraterlərin birinə “Quba” adı verilib. 1982-ci ildə isə Beynəlxalq Astronomiya İttifaqının Yunanıstanın Patros şəhərində keçirilən Baş Assambleyası alimin Marsa dair araşdırmalarını yüksək qiymətləndirib və bu planetin səthindəki kraterlərin birinin “İbrahimov” adı ilə adlandırılmasına qərar verib.
Nadir İbrahimov 1 yanvar 1977-ci ildə ürək çatışmazlığından vəfat edib. O, Quba şəhərində dəfn olunub.
Hazırda alimin Qubada yaşadığı ərazidə küçələrin birinə onun adı verilib.
İstinad edilən mənbələr:
