Düriyyə Gülbaba qızı Rəhimova 1929-cu ildə Qubanın Qımıl kəndində anadan olub.
O, orta təhsilini Quba şəhərində aldıqdan sonra Quba Dövlət Pedaqoji Məktəbində oxumuşdur. Düriyyə məktəb illərində rayon və respublika musiqi festivallarında iştirak edərək bir neçə dəfə birinci yerə layiq görülüb. O, bəstəkar Asəf Mehmanla tanış olub, onun ilk mahnılarını ifa edib.
Rəhimova 1947-1959-cu illərdə respublika özfəaliyyət kollektivlərinin müsabiqəsində birinci yer qazanmışdır. Sənətkar Pedaqoji məktəbi bitirdikdən sonra uşaq evində müəllim kimi çalışıb və Quba rayonunun Mədəniyyət Evinin direktoru olub.
Düriyyə 1960-cı ildə Quba Dövlət Dram Teatrına işə düzəlib. Həmin zaman o, 30-dan çox rol ifa etmişdir. 1962-ci ildə teatr bağlandıqdan sonra Rəhimova Dağıstan Mədəniyyət Nazirliyinin dəvəti ilə ailəsi ilə birlikdə Dağıstana köçüb. O, əvvəlcə radio komitəsində, sonra isə Süleyman Stalski adına Ləzgi Dövlət Teatrında işləməyə başlayır. 1989-cu ildə Düriyyə Rəhimova Ləzgi Teatrını tərk edərək uzun müddət Dərbənd Azərbaycan Dövlət Dram Teatrında çalışıb.
Özü haqda belə deyərdi: “Mən həyatımı səhnəsiz təsəvvür etmirəm”. Şair Bayram Səlimov Düriyyə Rəhimovanın səsinə heyran olaraq, onu “ləzgilərin bülbülü” adlandırmışdır.
Onun ifa etdiyi bir çox mahnılar Azərbaycan Dövlət Televiziya və Radio Verilişləri və Dağıstan Dövlət Televiziya və Radio Verilişləri Şirkətinin “Qızıl Fondları”na daxil edilmişdir.
Sənətkara 1965-ci ildə “Dağıstan Respublikasının Əməkdar artisti”, 1977-ci ildə isə “Dağıstan Respublikasının Xalq artisti” fəxri adları verilmişdir. 1986-cı ildə o, “Xalqlar Dostluğu” ordeni ilə təltif olunmuşdur.
Düriyyə Rəhimova 29 mart 2014-cü ildə Dərbənddə vəfat edib.
İstinad edilən mənbələr:
