Bu gün hərtərəfli ensiklopedik biliyə malik olan ziyalı Qafur Rəşad Ələkbər oğlu Mirzəzadənin doğum günüdür. O, 1884-cü il may ayının 6-da Şamaxıda anadan olub. Bəzi tədqiqatçılar onun Lahıcda anadan olduğunu yazırlar.
Qafurun boyaqçı babası bəzən yazı-pozu işı ilə məşğul olurdu. Boyaqçıllıqla məşğul olan bu nəslin "Mirzəzadə" soyadı məhz bu məşğulluq ilə bağlıdır.
Qafur ilk təhsilini mollaxanada alıb, 1894-cü ildə isə təhsil müddəti altı il olan Şamaxı Şəhər Məktəbinə daxil olub. Bu məktəbdə oxuyanlar 6-cı sinfi qurtarandan sonra 1 il də real (rüşdiyyə) məktəbdə oxuyaraq ali təhsil müəssisələrinə daxil ola bilərdilər.
Şamaxıya ən yaxın ali təhsil müəssisəsi də o vaxtlar Tiflisdə idi.
Ailəsinin maddi vəziyyəti ağır olduğu üçün Mirzəzadə ali təhsil ala bilməyib və ibtidai məktəbdə müəllim işləmək qərarına gəlib. O,bu məqsədlə 1901-ci ildə Bakı Klassik Gimnaziyasının nəzdində olan imtahan komissiyasına imtahan verir və böyük müsabiqənin yeganə qalibi olub. Qafur sonra 2 il Ali Pedaqoji kursda, bir də 1923-1927-ci illərdə Azərbaycan Politexnik İnstitutunun iqtisadiyyat fakültəsində oxuyub.
Q.R.Mirzəzadə 17 yaşına qədər Şamaxıda, sonra 24 yaşına qədər Lahıcda, ömrünün qalan 35 ilini isə Bakıda yaşayıb. O,1943-cü ildə,müharibənin qızğın vaxtında təblığatçı kimi Şamaxıya göndərilib, burada xəstələndiyi üçün Bakıya gətirilir və noyabrın 26-da dünyasını dəyişib.
