31 Mart – Azərbaycanlıların Soyqırımı Günü tariximizin ən faciəli səhifələrindən biridir.
Shimal.News xatırladır ki, 1998-ci ildə Azərbaycan Respublikasının Prezidenti Heydər Əliyevin sərəncamı ilə 31 mart Azərbaycanlıların Soyqırımı Günü kimi elan edilib.
1918-ci ilin mart-aprel aylarında Bakı Soveti və “Daşnaksütyun” partiyasına bağlı erməni silahlı dəstələri Bakı, Quba, Şamaxı, Qərbi Azərbaycan əraziləri (indiki Ermənistan) və digər bölgələrdə minlərlə günahsız azərbaycanlını qətlə yetiriblər.
Bu hadisələr xüsusi amansızlıqla həyata keçirilib. Şəhərlər və kəndlər yandırılıb, mülki əhali, o cümlədən qadınlar, uşaqlar və yaşlı insanlar kütləvi şəkildə qətlə yetirilib.
Quba şəhərində aparılan arxeoloji qazıntılar zamanı kütləvi məzarlıqlar aşkarlanıb və bu, ermənilərin törətdiyi qətliamın tarixi sübutlarından biri olub. Burada müxtəlif etnik qrupların, o cümlədən azərbaycanlıların və ləzgilərin qətlə yetirildiyi müəyyən edilib.
Şamaxıda minlərlə insan öldürülmüş, qadınlar və uşaqlar vəhşicəsinə qətlə yetirilib. Gəncədən Lənkərana qədər olan ərazilərdə də eyni cinayətlər törədilib. Erməni silahlı dəstələri tərəfindən evlər yandırılıb, ailələr bütövlükdə məhv edilib, məscidlər və tarixi abidələr dağıdılıb.
Azərbaycan dövləti 31 Mart soyqırımının dünya ictimaiyyətinə çatdırılması üçün mühüm addımlar atır. Bu gün ölkə daxilində və xaricdə müxtəlif tədbirlər keçirilir, elmi konfranslar təşkil olunur və sənədlər üzərində araşdırmalar aparılır.
