27 dekabr 23-cü Quba-Qusar batalyonunun yaranma günü kimi qeyd edilir. O, Quba rayon prokuroru Əli Eyvazovun təşəbbüsü ilə 1992-ci ildə könüllülər rotasının əsasında təşkil olunmuşdur.
Batalyon Quba və Qusardan olan 490 könüllüdən ibarət olub. Sonra isə Zaqatala rotasından daha 100 nəfər ona qatılıb.
1993-cü ilin noyabrında batalyon cəbhəyə, Xocavənd istiqamətinə göndərilib və 704-cü briqadanın tərkibinə daxil edilib. Həmin il dekabrın 27-si batalyon ilk dəfə Xocavənd istiqamətindəki döyüşdə iştirak edib. İlk döyüşdə 7 əsgər şəhid olub, 22 nəfər isə yaralanıb.
1994-cü ilin martında batalyon Füzuli istiqamətinə keçirilib. Bir müddət sonra, iyun ayında ləğv olunub.
Ümumilikdə, Birinci Qarabağ müharibəsində Quba-Qusar batalyonu 48 şəhid verib, 7 nəfər itkin düşüb, 114 nəfər isə yaralanıb.
Quba-Qusar batalyonunun xərclərini rayon ictimaiyyəti öz üzərinə götürmüşdü. Onlar cəbhəyə ərzaq məhsulları, paltar, yanacaq göndərirdilər.
Heydər Əliyevin göstərişi ilə hər il 23-cü Quba-Qusar batalyonunun yaranma günü qeyd edilir.
2010-cu ildə Quba-Qusar batalyonunun döyüş yoluna həsr olunmuş “Bir batalyonun tarixi” adlı kitab çapdan çıxıb. Onun müəllifi, batalyonun komandiri olmuş Əli Eyvazovdur.
[caption id="attachment_34227" align="alignnone" width="640"]
Quba-Qusar batalyonu[/caption]
