Bu gün müstəqil dövlət olan Azərbaycanın ərazi bütövlüyü və suverenliyi qəhrəman əsgər və zabitlərinin, şəhidlərinin qanı hesabına qazanılıb. Xalqımız üçün öz taleyinə sahib olmaq, müstəqil dövlətimizi yaradaraq inkişaf etdirmək böyük nailiyyətdir.
Tarixin müxtəlif mərhələlərində üzləşdiyimiz çətinliklərə, işğala, məhrumiyyətlərə baxmayaraq, heç bir qüvvə xalqımızın müstəqillik, dövlətçilik əzmini sarsıda bilmədi. Azərbaycan 1991-ci ildə müstəqilliyini elan etməklə dövlət suverenliyini bərpa etdi.
Suveren dövlət beynəlxalq hüquqda ali hakimiyyəti təmsil edən, özünün daxili və xarici siyasətində tamamilə müstəqil olan, başqa dövlətin hakimiyyətindən asılı olmayan və hansısa bir coğrafi ərazidə suverenliyi olan dövlətdir.
Azərbaycan 1990-cı illərin əvvəllərindən Ermənistanın hərbi təcavüzü ilə üzləşdi. Beynəlxalq birlik tərəfindən tanınmış və suveren ərazilərin 20 faizi işğal edildi, suveren ali hakimiyyətin dövlətin müəyyən ərazisi daxilində tətbiqinə maneə yarandı.
Ermənistanın növbəti hərbi təcavüz cəhdinə və ardıcıl təxribatlarına cavab olaraq 2020-ci il sentyabrın 27-də başlayan Vətən müharibəsi nəticəsində Azərbaycan Silahlı Qüvvələri Ermənistan ordusunu 44 gün ərzində darmadağın etdi və tarixi Zəfər qazandı. Bununla da öz torpaqlarını 30 illik işğaldan azad etdi.
Qarabağ iqtisadi rayonunda 19 sentyabr 2023-cü ildə Əhmədbəyli-Füzuli-Şuşa avtomobil yolunda terror məqsədilə əvvəlcədən quraşdırılan minanın partlaması nəticəsində Azərbaycan Avtomobil Yolları Dövlət Agentliyinə məxsus nəqliyyat vasitəsi sıradan çıxıb və mülki şəxslər həlak olub. Həmin gün Daxili İşlər Nazirliyinin Daxili Qoşunlarının hərbi qulluqçularını daşıyan nəqliyyat vasitəsi də əvvəlcədən quraşdırılan minaya düşməsi nəticəsində hərbi qulluqçularımız yaralanıb və həlak olublar.
Törədilən genişmiqyaslı təxribatların qarşısının alınması və Ermənistan silahlı qüvvələrinin qalıqlarının tərk-silah edilərək torpaqlarımızdan çıxarılması, həmin ərazilərdə Azərbaycan Respublikası konstitusiya quruluşunun bərpa edilməsi məqsədilə antiterror tədbirlərinə başlandı. Düşmənin ordumuzun qarşısında cəmi 23 saat dayanmağa gücü çatdı. Azərbaycan hakimiyyətinin aliliyi və nəzarət funksiyası tam şəkildə bərpa olundu.
