Əntiqə Qonaqova 21 yanvar, 1959-cu ildə Xaçmaz rayonunun Maqsudkənd kəndində anadan olub.
Shimal.News məlumat verir ki, Azərbaycanın ilk qadın hərbi jurnalisti olmaqla yanaşı Əntiqə Qonaqova Azərbaycan Respublikasının əməkdar jurnalisti adına da layiq görülüb.
O, 1974-cü ildə Maqsudkənd 8 illik məktəbini, 1976-cı ildə isə Ləcət kənd orta məktəbini yaxşı və əla qiymətlərlə bitirib. 1983-cü ildə Bakı Dövlət Universitetinin jurnalistika fakültəsinin əyani bölməsini radio-televiziya jurnalistikası ixtisası üzrə, 2010-cu ildə isə həmin universitetin hüquq fakültəsinin qiyabi bölməsini fərqlənmə diplomu ilə bitirib.
Əntiqə Qonaqova Qarabağda erməni quldurlarının təcavüzü başlayan gündən jurnalist kimi dəfələrlə cəbhə bölgələrində, səngərlərdə olub.
Əməkdar jurnalist olaraq o, Azərbaycan Jurnalistlər Birliyinin "Həsən Bəy Zərdabi" və "Salatın Əsgərova" mükafatlarının laureatı seçilib. "24 yaşdan asılmış ömür" oçerki Respublika Həmkarlar Komitəsinin fəxri fərmanına layiq görülüb. "Bu günəş Türk üfüqlərində doğdu" məqaləsi Böyük Atatürk haqqında yazılan ən gözəl yazı müsabiqəsinin qalibi seçilib.
