Bu gün, 15 iyun tarixində Azərbaycanda Milli Qurtuluş Günü qeyd olunur. Bu əlamətdar gün ölkənin müasir tarixində dönüş nöqtəsi hesab olunur.
1993-cü ilin iyun ayında ölkədə yaranmış siyasi böhran, qarşıdurmalar və idarəolunmazlıq fonunda xalqın təkidli tələbi ilə ümummilli lider Heydər Əliyev hakimiyyətə qayıtdı. O, 15 iyun 1993-cü ildə Azərbaycan Respublikası Ali Sovetinin sədri seçildi. Məhz bu tarix ölkənin ictimai-siyasi həyatında sabitliyin bərqərar olmasına, vətəndaş müharibəsinin qarşısının alınmasına və dövlətçiliyin qorunub saxlanmasına səbəb oldu.
Milli Qurtuluş Günü hər il ölkə üzrə rəsmi və ictimai tədbirlərlə qeyd olunur.
Azərbaycan xalqı dövlətçiliyinin qorunmasında, müstəqil inkişaf yolunun müəyyənləşməsində mühüm rol oynayan bu tarixi hadisəni xatırlayır və dəyərləndirir.
