Bir müddət əvvəl Xaçmaz şəhərinin Nəriman Nərimanov prospektində yerləşən yaşayış binasına xidmət göstərən transformatorun sakinlər üçün təhlükə mənbəyinə çevrilməsi ilə bağlı xəbər yayımlamışdıq. Sakinlər iddia edirlər ki, qurğu yaşayış evinə demək olar ki, bitişik quraşdırılıb və bu vəziyyət insanların həyatı üçün real təhlükə yaradır.
Məsələ tərəfimizdən işıqlandırıldıqdan sonra Xaçmaz Rayon İcra Hakimiyyətindən bildirilib ki, transformator "Azərişıq ASC" tərəfindən normativ qaydalara uyğun quraşdırılıb.
Xaçmaz şəhər İƏD isə fərqli mövqe səsləndirib. Qurumun məlumatına görə, transformator həmin ərazidə əvvəlcədən mövcud olub, sonradan vətəndaş tərəfindən ev ona bitişik tikilib:
"Transformatorun yeri köhnə qurğunun yeridir. 2018-ci ildə yenilənib, ev isə 2020-ci ildə tikilib. Müraciət əsassızdır".
Normativlərə görə isə risk açıq görünür.
Shimal.News-a müraciət edən ev sahibi Natiq Əliyevin sözlərinə görə, transformatorla ev arasındakı məsafə yarım metrdən də azdır.
O bildirir ki, qurğunun səsi və titrəyişi evin içərisində aydın hiss olunur.
"Bu, açıq təhlükə mənbəyidir. Ani nasazlıq və ya qığılcım bütün evi alova bürüyə bilər. İllərdir müraciət edirik, amma nəticə yoxdur", – deyə sakin narazılığını ifadə edib.
Mövcud təhlükəsizlik qaydalarına əsasən, elektrik qurğuları ilə yaşayış evləri arasında müəyyən məsafə saxlanılmalıdır.
Gərginlikdən asılı olaraq minimum 1.5 - 4 metr (1-10 kV üçün) və daha yüksək məsafələr saxlanılmalıdır. Mühafizə zonalarında tikinti işləri məhdudlaşdırılır. Bu tələblər insan həyatı və əmlakın qorunması üçün tətbiq olunur.
Ərazidə yaşayanlar risklərin aradan qaldırılmasını və məsul qurumların konkret addımlar atmasını tələb edirlər.
Görünən odur ki, problemlə bağlı qurumlar fərqli-fərqli açıqlamalar versələr də, transformatorun düzgün yerləşdirildiyini, məsələdə günahın ev sahibində olduğuna işarə edirlər. Amma maraqlıdır ki, qurum evin 2020-ci ildə inşa edildiyini desə də, vətəndaşın fərdi yaşayış evi tam qanuni əsaslarla mövcuddur. Əmlakın çıxarışı və texniki pasportu var, mülkiyyət hüquqları isə hələ 2004-cü ildən dövlət qeydiyyatına alınıb. Bu fakt sakinlərin narahatlığını daha da artırır.
