Xaçmaz rayonunda Caqacuq çayı üzərində yeni körpünün inşası davam etdirilir.
Shimal.News xəbər verir ki, Azərbaycan Avtomobil Yolları Dövlət Agentliyi tərəfindən həyata keçirilən tikinti-bərpa işləri Prezident İlham Əliyevin leysan yağışları və selin fəsadlarının aradan qaldırılması ilə bağlı imzaladığı sərəncama əsasən aparılır.
İki aşırımlı yeni körpü Aşağı Zeyid-Bərqov kəndlərini birləşdirən avtomobil yolunun Caqacuq çayı üzərindən keçən hissəsində inşa olunur.
Xaçmaz Rayon İcra Hakimiyyətinin başçısı Elnur Rzayev Azərbaycan Avtomobil Yolları Dövlət Agentliyinin mütəxəssislərinin iştirakı ilə tikinti işlərinin gedişi ilə tanış olub.
Layihəyə əsasən, körpüyə yanaşma yollarının və çay sularının axınının tənzimlənməsinə xidmət edən su nizamlayıcı qanadların da inşası nəzərdə tutulub.
Tikinti işlərinin əsas məqsədi yol infrastrukturunun dayanıqlılığını artırmaq, sel sularının yarada biləcəyi fəsadların qarşısını almaq, eləcə də sakinlərin təhlükəsiz və fasiləsiz hərəkətini təmin etməkdir.
