Noyabrın 6-sı Azərbaycanda Televiziya və Radio İşçilərinin Peşə Bayramı Günü kimi qeyd olunur.
Shimal.News məlumat verir ki, Şimal rayonlarını əhatə edən radio-rele xətti və bölgələrdə yayım infrastrukturunun inkişafı diqqət çəkir.
1926-cı ilin bu günündə ölkədə ilk radio verilişi yayımlanıb və efirdən "Danışır Bakı" sözləri səsləndirilib.
Şimal bölgələri ilə bağlı teleradio infrastrukturunun inkişafında mühüm mərhələlərdən biri 2019-cu ildə başa çatdırılan radio-rele xəttinin rəqəmsallaşdırılması olub. "Radio-Televiziya Yayımı və Peyk Rabitəsi" İstehsalat Birliyi Fatmayı–Sumqayıt–Xızı–Dağbilici (Şabran)–Yergüc–Quba istiqamətində 185 kilometr uzunluğunda radio-rele xəttini rəqəmsal sistemə keçirərək istismara verib.
Bu xətt dövlət, ictimai, özəl və regional radio-televiziya proqramlarının bölgələrdəki yayım stansiyalarına çatdırılması üçün istifadə olunur.
Qeyd edək ki, Azərbaycanda televiziya yayımı 1956-cı il fevralın 14-də Bakı Televiziya Studiyasının efirə çıxması ilə başlayıb. İlk verilişdə ekranda Nəcibə Məlikova görünüb və "Göstərir Bakı" sözləri ilə tamaşaçıları salamlayıb.
Sonrakı illərdə yayım infrastrukturu ölkənin müxtəlif bölgələrini əhatə edib. 1961-ci ildə Gəncə, Göyçay və Şuşada güclü televiziya stansiyaları, 1962-ci ildə isə Naxçıvanda kiçik güclü televiziya stansiyası və studiya qurulub.
2016-cı il dekabrın 20-də ölkə ərazisində analoq televiziya yayımı tam dayandırılıb və rəqəmsal yayıma keçid başa çatdırılıb.
