Qusar rayonunun Qullar kənd sakinləri ciddi su problemi ilə üzləşdiklərini bildirirlər.
Azpolitika.info-nun məlumatına görə, sakinlər bildirirlər ki, Samur-Abşeron su kanalı kənd ərazisindən keçsə də, artıq bir aydan çoxdur əkin sahələrinə su verilmir. Nəticədə bağlara və təsərrüfatlara ciddi ziyan dəyib, bəzi məhsullar isə tamamilə məhv olub.
Kənd sakinləri bildiriblər ki, məsələ ilə bağlı aidiyyəti qurumlara dəfələrlə müraciət etsələr də, problem hələ də həllini tapmayıb.
Məsələ ilə bağlı açıqlama verən Azərbaycan Su Ehtiyatları Agentliyinin Qusar Su Meliorasiya Sistemlərinin İstismarı İdarəsinin direktor müavini Ramazan Adilov problemin texniki səbəblərlə əlaqədar yarandığını bildirib.
Onun sözlərinə görə, ərazidə baş verən sel axınları su arxlarını yararsız hala salıb:
"Texnika çatışmazlığı səbəbindən suyun verilişində gecikmə yaranıb. Hazırda arxların təmizlənməsi istiqamətində işlər aparılır. Ən geci iki gün ərzində problem aradan qaldırılacaq", – deyə o qeyd edib.
