Quba–Xaçmaz avtomobil yolunun Yergüc kəndi ərazisində yerləşən iri çinar ağacı sürücülər və sakinlər üçün ciddi təhlükə mənbəyinə çevrilib.
Sakinlərin Shimal.News-a bildirdiyinə görə, ağac təxminən 45 dərəcə bucaq altında yol istiqamətinə əyilib və artıq üç aydan çoxdur ki, bu vəziyyətdə qalır. Küləkli və yağışlı havalarda ağacın aşaraq hərəkətdə olan nəqliyyat vasitələrinin üzərinə düşməsi ehtimalı narahatlıq yaradır.
Qeyd olunur ki, yaz mövsümündə qol-budaq və yarpaqların inkişaf etməsi ağacın çəkisini daha da artırır. Son vaxtlar müşahidə olunan qeyri-sabit hava şəraiti isə təhlükəni daha da aktuallaşdırır.
Bu istiqamətdə hərəkət edən sürücülər aidiyyəti qurumların məsələyə operativ müdaxilə etməsinin vacibliyini vurğulayırlar. Onların sözlərinə görə, mümkün faciənin qarşısını almaq üçün qabaqlayıcı tədbirlərin görülməsinə ehtiyac var.
