Quba şəhəri ilk dəfə olaraq beynəlxalq səviyyəli gənclər düşərgəsinə ev sahibliyi edib.
Shimal.News xəbər verir ki, Ədliyyə Nazirliyi və Gənclər və İdman Nazirliyinin təşkilati dəstəyi, "Ədliyyə Könüllüləri" İctimai Birliyinin təşəbbüsü ilə Qubada "Türk Dövlətləri Təşkilatı Modeli 2026" beynəlxalq gənclər düşərgəsi keçirilib.
Türk Dövlətləri Təşkilatının fəaliyyət prinsiplərinin və əməkdaşlıq mexanizmlərinin gənclər arasında təbliğini hədəfləyən layihə çərçivəsində Türk dünyasının müxtəlif ölkə və regionlarından gələn gənclər bir platformada bir araya gəliblər.
Düşərgənin açılış mərasimində gənclər və idman nazirinin müavini İndira Hacıyeva, ədliyyə nazirinin müşaviri Tağı Eynullayev, Quba Rayon İcra Hakimiyyəti başçısının müavini Səidə Abasova və digər rəsmi şəxslər iştirak ediblər.
Layihə çərçivəsində iştirakçılar Türk Dövlətləri Təşkilatının strukturunu əks etdirən simulyasiya oyunlarında iştirak edərək baş nazir, nazir, komitə rəhbəri, media və vətəndaş cəmiyyəti nümayəndəsi rollarında çıxış ediblər. Gənclər müxtəlif istiqamətlər üzrə əməkdaşlıq təşəbbüsləri hazırlayıb, diplomatik müzakirələr aparıblar.
Düşərgə müddətində liderlik, beynəlxalq münasibətlər, dövlət idarəçiliyi, hüquq, innovasiya və qərarvermə proseslərinə həsr olunmuş panel müzakirələri və təlimlər də təşkil olunub.
Layihənin sonunda iştirakçılara sertifikatlar təqdim olunub, fərqlənən komandalar və gənclər mükafatlandırılıb.
