Bu gün - sentyabrın 20-si Azərbaycanda Dövlət Suverenliyi Günü qeyd olunur.
2023-cü il sentyabrın 19-da Azərbaycanın Qarabağ iqtisadi rayonunda Ermənistan silahlı qüvvələrinin birləşmələri və qanunsuz erməni silahlı dəstələri tərəfindən törədilən genişmiqyaslı təxribatların qarşısının alınması məqsədilə lokal xarakterli antiterror tədbirlərinə başlanılıb.
Tədbirlərin əsas məqsədi Ermənistan silahlı qüvvələrinin qalıqlarının ərazilərimizdən çıxarılması, qanunsuz silahlı dəstələrin tərksilah edilməsi və Qarabağda Azərbaycan Respublikasının konstitusiya quruluşunun bərpa olunması olub.
Antiterror tədbirləri cəmi 23 saat 43 dəqiqə davam edib və sentyabrın 20-də başa çatıb. Əməliyyat nəticəsində qanunsuz silahlı birləşmələr silahı yerə qoyub, Ermənistan silahlı qüvvələrinin birləşmələrinin Azərbaycan ərazilərini tərk etməsi və qanunsuz silahlı dəstələrin buraxılması ilə bağlı razılaşma əldə olunub. Qarabağdakı separatçı rejim də özünü buraxdığını elan edib.
Beləliklə, Azərbaycan Respublikasının bütün ərazisində qanunun aliliyi təmin olunub və dövlət suverenliyi tam bərpa edilib. Bu tarixi hadisənin ildönümünün əbədiləşdirilməsi məqsədilə Prezident İlham Əliyevin 19 sentyabr 2024-cü il tarixli Sərəncamı ilə hər il sentyabrın 20-si Azərbaycanda Dövlət Suverenliyi Günü kimi qeyd edilir.
