Azərbaycan Dövlət Pedaqoji Universitetinin Quba filialında təhlükəli vəziyyət qeydə alınıb.
Shimal.News-a daxil olan məlumata əsasən, təhsil müəssisəsində kişilər üçün nəzərdə tutulan sanitar qovşağında quraşdırılan qaz su qızdırıcısının (kombi) qoruyucu örtüyü yoxdur, daxili mexanizmlər və elektrik naqilləri açıq vəziyyətdə qalıb.
Mütəxəssislər bildirirlər ki, bu cür nasaz və nəzarətsiz vəziyyət dəm qazı sızması, qısaqapanma və hətta partlayış riski yarada bilər. Qurğunun üzərində müşahidə olunan pas və korroziya isə onun uzun müddətdir texniki baxışdan keçirilmədiyini göstərir.
Bundan əlavə, qızdırıcının üzərinə dəsmal sərilməsi, eləcə də nəm mühitdə açıq elektrik kabellərinin olması yanğın və elektrik vurması riskini daha da artırır.
Divarda yerləşdirilən "Təmizliyə riayət edin" xəbərdarlığı fonunda ortaya çıxan bu mənzərə təhsil müəssisəsində nəzarət və təhlükəsizlik tədbirlərinin zəif təşkil olunduğunu açıq şəkildə nümayiş etdirir.
