Qəbələ şəhərində "Sülh Körpüsü" təşəbbüsü çərçivəsində Azərbaycan və Ermənistan vətəndaş cəmiyyətlərinin nümayəndələrinin iştirakı ilə keçirilən ikitərəfli dəyirmi masa davam edir.
Shimal.News xəbər verir ki, Azərbaycan Prezidentinin köməkçisi, Prezident Administrasiyasının xarici siyasət məsələləri şöbəsinin müdiri Hikmət Hacıyev tədbir iştirakçıları ilə görüşərək fikir mübadiləsi aparıb və onların suallarını cavablandırıb.
Görüş zamanı Azərbaycanın sülh gündəliyinə sadiqliyi bir daha vurğulanıb. Bildirilib ki, ölkə Vaşinqton şəhərində Azərbaycan və Ermənistan arasında razılaşdırılmış sülh gündəliyinə və sammitin ruhuna sadiqdir.
Eyni zamanda iki ölkə arasında iqtisadi əlaqələrin formalaşdığı, Azərbaycan ərazisindən Ermənistana məhsulların tranzit daşımalarının həyata keçirildiyi diqqətə çatdırılıb. TRIPP layihəsinin icrasının isə regionda ümumi nəqliyyat mənzərəsinin dəyişməsinə və əməkdaşlığın genişlənməsinə töhfə verəcəyi qeyd olunub.
Hikmət Hacıyev bildirib ki, Azərbaycan və Ermənistan arasında danışıqların ikitərəfli xarakter daşıdığı kimi, vətəndaş cəmiyyətləri arasında qurulan dialoq və etimad tədbirlərinin də məhz bu formatda davam etdirilməsi vacibdir.
O, həmçinin vurğulayıb ki, dünyada artan gərginlik və müharibələr fonunda Cənubi Qafqazda sülh və təhlükəsizliyin təmin olunması xüsusi əhəmiyyət kəsb edir.
