Abhay Kumar Azərbaycanın şimal-qərb bölgələrinə səfər edib.
Shimal.News xəbər verir ki, diplomatın Şamaxı, Şəki və Qəbələni əhatə edən səfəri zamanı tarixi, mədəni və elmi məkanlar ziyarət olunub.
Hindistanın Azərbaycandakı səfirliyinin yaydığı məlumata görə, səfərlər Hindistan və Azərbaycan arasında mövcud olan mədəni yaxınlığı və xalqlar arasında formalaşan əlaqələri bir daha nümayiş etdirib.
Diplomat ilk olaraq Diri Baba türbəsini ziyarət edib. Burada türbənin direktoru Yusif Nazim Ərəbsoy ilə görüş zamanı abidənin tarixi və mənəvi əhəmiyyəti barədə məlumat verilib.
Şəkidə səfir Şəki Tarix-Diyarşünaslıq Muzeyi və Mirzə Fətəli Axundovun Ev-Muzeyi ilə tanış olub. Muzey rəhbərləri Vüqar Mustafayev və Ulduz Xəlilova diplomata Azərbaycanın tarixi və ədəbi irsi barədə məlumat veriblər.
Səfər çərçivəsində ABAD Keramika və Tətbiqi Sənəti Mərkəzi və Şəki Şəbəkə Emalatxanasında yerli sənətkarlarla görüş keçirilib, keramika, xalçaçılıq və şəbəkə sənəti üzrə əməkdaşlıq imkanları müzakirə olunub.
Diplomat həmçinin Şəki Xan Sarayını ziyarət edib. Ona XVIII əsr memarlıq abidəsinin tarixi, şəbəkə pəncərələri və bədii xüsusiyyətləri barədə məlumat təqdim olunub.
Qəbələdə isə səfir Qəbələ Arxeoloji Mərkəzi, Dövlət Tarix-Bədii Qoruğu və qədim Kabalaka şəhər yerində olub. Burada diplomat Qəbələnin 2500 illik tarixi və Qafqaz Albaniyasının paytaxtı kimi rolu ilə bağlı məlumatlandırılıb.
Səfər zamanı iki xalq arasında mədəni bağların güclü olduğu da xüsusi vurğulanıb. Bildirilib ki, Azərbaycanda hind filmlərinə, musiqisinə və rəqslərinə maraq bu gün də davam edir. Yerli sakinlərin Raj Kapoor, Hema Malini, Amitabh Bachchan və Shah Rukh Khan kimi kino ulduzlarını sevgi ilə xatırladıqları qeyd olunub.
