Azərbaycan Alban-Udi xristian dini icması Azərbaycanda akkreditə olunmuş diplomatik korpus nümayəndələrinin Qarabağ və Şərqi Zəngəzura səfərinə Ermənistanın siyasi və ictimai dairələrində verilən reaksiyaları pisləyib.
İcmanın sədri Robert Mobili bununla bağlı bəyanat yayıb.
Bəyanatda diplomatların, o cümlədən Gəncəsər və Xudavəng məbədlərinə səfərinə qarşı Ermənistanda səsləndirilən fikirlərin qəbuledilməz olduğu bildirilib. İcma bu reaksiyaları "revanşist əhvali-ruhiyyəli münasibət" kimi qiymətləndirib.
Bəyanatda Qafqaz Albaniyasının tarixi və dini-mədəni irsi ilə bağlı məsələlərə xüsusi yer verilib. İcma Gəncəsər və Xudavəng məbədlərinin Alban irsi olduğunu bildirərək, bu abidələrin Ermənistan tərəfindən erməni irsi kimi təqdim edilməsinə etiraz edib.
Robert Mobili qeyd edib ki, Alban Apostol Kilsəsi Qafqazın qədim xristian kilsələrindən biri olub və Alban irsi Azərbaycan ərazisində formalaşmış tarixi-mədəni irsin bir hissəsidir.
Bəyanatda 1836-cı ildə Çar Sinodunun qərarı ilə Alban Apostol Kilsəsinin fəaliyyətinə son qoyulmasından sonra onun maddi və mənəvi irsinin bir hissəsinin Erməni-Qriqoryan kilsəsi tərəfindən mənimsənildiyi iddia edilir.
İcma həmçinin Azərbaycanın işğaldan azad edilmiş ərazilərində yerləşən qədim Alban məbədlərində dini ayinlərin keçirilməsinin mümkün olduğunu vurğulayıb. Bəyanatda Gəncəsər, Ağoğlan, Xudavəng və digər məbədlərin adı çəkilib.
Mobili Azərbaycanın Alban-Udi icmasının Qəbələ və Oğuzda dini ənənələrini yaşatdığını, həmçinin Qarabağdakı qədim Alban məbədlərinə səfərlər etdiyini bildirib.
Bəyanatın sonunda Ermənistan tərəfinə regionda sülh prosesinə mane olan addımlardan və tarixi məsələlərin siyasi qarşıdurma predmetinə çevrilməsindən çəkinmək çağırışı yer alıb.
Qeyd edək ki, sentyabrın 11-12-də Azərbaycanda akkreditə olunmuş diplomatik korpus nümayəndələri Qarabağ və Şərqi Zəngəzura səfər edib, səfər çərçivəsində Gəncəsər və Xudavəng məbədlərini də ziyarət ediblər.
Mənbə: Azərtac
