Xaçmaz rayonunda 46 yaşlı kişi bacısının həyat yoldaşına xəsarət yetirib.
Demokrat.az-ın məlumatına görə, hadisə ötən ilin martın 17-də rayonun kəndlərindən birində qeydə alınıb.
1985-ci il təvəllüdlü Əziz axşam saat 20.00 radələrində yaşadığı evin həyətində yeznəsi Fəridlə (adlar şərtidir) mübahisə edib.
İddialara görə, Əziz mübahisə zamanı Fəridin sifətinin sol nahiyəsinə yumruq zərbəsi endirib. Nəticədə zərərçəkən müxtəlif dərəcəli bədən xəsarətləri alıb.
Hadisədən sonra Əziz barəsində Cinayət Məcəlləsinin 128-ci maddəsi ilə ittiham irəli sürülüb. O, məhkəmədə özünü təqsirli bilib. Əziz bildirib ki, bacısı Fatimə əri ilə dəfələrlə mübahisə edib və 2025-ci ilin mart ayında ata evinə qayıdıb. Bu vaxt yeznəsi evə gələrək ailə üzvlərini təhqir edib və evdən getmək istəməyib.
Bu isə mübahisəni daha da gərginləşdirib. Əsəbiləşən Əziz ona bir dəfə yumruq vurduğunu deyib.
Məhkəmə zamanı tərəflər barışıb. Zərərçəkən şikayətini geri götürüb.
Nəticədə məhkəmə cinayət təqibinə xitam verib və Əziz məsuliyyətdən azad olunub.
