Oğurluq və quldurluqda təqsirləndirilən Cavid Əlibəylinin barəsindəki hökmdən verilən apellyasiya şikayəti üzrə məhkəmə iclası başa çatıb.
Shimal.News-un əldə etdiyi məlumata görə, 2007-ci ildə anadan olan Cavid Əlibəyli tanışı ilə qabaqcadan əlbir olaraq 2022-ci ilin martın 5-də Xaçmaz rayonunda yaşayan zərərçəkmiş Sevdaya məxsus, hasarla əhatə olunmuş və yeni inşa edilmiş yaşayış evinin qarşısına gəlib.
Ətrafda heç kimin olmadığına əmin olduqdan sonra hasardan aşaraq həyətyanı sahəyə qanunsuz daxil olub və evin divarlarına quraşdırılmış, ümumi uzunluğu 1100 metr olan, mis tərkibli elektrik naqillərini gizli yolla talayıb. Naqillərin ümumi dəyərinin 770 manat olduğu müəyyən edilib.
Bundan başqa, o, tanışları və yetkinlik yaşına çatmayan şəxslə ilə birlikdə həmin ayın 11-də digər zərərçəkmiş Tahirə məxsus yeni tikili evə daxil olub. Evə asma qıfılı sındıraraq daxil olan təqsirləndirilən şəxs və digər şəxslər müxtəlif ölçülü mis tərkibli elektrik naqilləri və bir ədəd elektrikli dəmir kəsən aləti (laqonda) gizli yolla ələ keçiriblər. Talanan əmlakın ümumi dəyəri 730 manat təşkil edib.
Eyni zamanda, Kərim həmin ilin mayın 1-də Xaçmaz şəhər mərkəzi bazarında zərərçəkmiş Mahirə məxsus piştaxtanın üzərindən içərisində 800 manat nağd pul, şəxsiyyət vəsiqəsi, plastik pensiya kartı və pul kisəsi olan əmlakı götürərək ümumilikdə 807 manat maddi ziyan vurub.
Araşdırmalarla həmçinin müəyyən edilib ki, Xaçmaz şəhəri, Bayraq Meydanının yaxınlığında zərərçəkmiş Qasımın qarşısını kəsib. Üzərində olan qatlanan cib bıçağı ilə onu hədələyib və cibində olan 149 manat pulunu ələ keçirib.
Sumqayıt Ağır Cinayətlər Məhkəməsinin hökmü ilə Cavid Əlibəyli törətdiyi cinayət əməllərinə görə 7 il 10 ay müddətinə azadlıqdan məhrumetmə cəzasına məhkum edilib. O, barəsindəki hökmdən apelyasiya şikayəti verib. Sumqayıt Apellyasiya Məhkəməsində hakim Ruhiyyə Əsgərovanın sədrliyi ilə keçirilən prosesdə qərara əsasən, apellyasiya şikayəti təmin edilməyib.
Qeyd edək ki, adlar şərtidir.
