Xaçmaz rayonundan bir nəfəri zorla apararaq Bakıda qanunsuz saxlayıb döyməkdə təqsirləndirilən iki şəxsə hökm oxunub.
Pravda.az-ın məlumata görə, Bakı Ağır Cinayətlər Məhkəməsinin qərarı ilə təqsirləndirilən şəxslərdən biri 8 il 6 ay, digəri isə 9 il müddətinə azadlıqdan məhrum edilib.
İstintaq materiallarına əsasən, hadisə 5 min manatlıq borc mübahisəsi zəminində baş verib. Təqsirləndirilən şəxslər zərərçəkmişin Xaçmaz rayonunun Ukuroba kəndinə gələcəyini öyrənərək onu yolda saxlayıblar. Zərərçəkmişin əl-qolu bağlanıb, zor tətbiq edilərək avtomobillə Bakıya aparılıb.
Məhkəmə araşdırması zamanı məlum olub ki, o, bir müddət paytaxtda saxlanılıb və müxtəlif xəsarətlər alıb. Daha sonra qaçmağa cəhd etsə də, yenidən tutulub. Zərərçəkmişin kömək çağırışlarından sonra hadisə iştirakçıları ərazini tərk ediblər.
Cinayət işi üzrə digər təqsirləndirilən şəxsə qanunsuz psixotrop maddə saxlama ittihamı da verilib. Məhkəmə hər iki şəxsi təqsirli bilərək barələrində azadlıqdan məhrumetmə cəzası təyin edib.
