Siyəzəndə iki qardaş arasında baş verən mübahisə cinayətlə nəticələnib.
Hadisə bu il fevralın 8-də Siyəzən şəhərində baş verib.
Mübahisə zamanı 1987-ci il təvəllüdlü Həsən qardaşı Səlimin (adlar şərtidir) baş və ayaq nahiyəsinə yumruq və təpiklə bir neçə dəfə zərbə endirib. Nəticədə zərərçəkmiş şəxs xəsarətlər alıb.
Həsənə Cinayət Məcəlləsinin 128-ci maddəsi ilə ittiham elan olunub.
Təqsirləndirilən şəxs məhkəmədə özünü günahkar bilib. O bildirib ki, hadisə günü sərxoş vəziyyətdə evə gəlib, həyat yoldaşı ilə mübahisə edib. Bu zaman qardaşı ona irad bildirib və yatmasını istəyib. Bundan sonra qardaşına zərbələr endirib.
Həsən sonradan əməlindən peşman olduğunu deyib. O bildirib ki, hazırda qardaşı ilə barışıblar və zərərçəkmişin ona qarşı heç bir şikayəti yoxdur.
Siyəzən Rayon Məhkəməsinin hökmü ilə təqsirləndirilən şəxs hər ay qazancının 10 faizi dövlət nəfinə tutulmaqla 1 il müddətinə islah işləri cəzasına məhkum edilib.
Mənbə: Demokrat.аz
