Xaçmaz rayonu Yalama kəndində iki nəfəri öldürməkdə və evi yandırmaqda təqsirləndirilən Ramin Ağaxanov barəsində verilmiş qərardan kassasiya şikayəti verilib.
Pravda.az-ın məlumatına görə, şikayət Ali Məhkəmədə araşdırılacaq.
Təqsirləndirilən şəxs cəzasının yüngülləşdirilməsini xahiş edir.
Qeyd edək ki, hadisə 2023-cü ilin aprel ayında baş verib. Kənd sakinləri Aslan Tarverdiyev və Rumayə Tarverdiyevanın meyitləri yaşadıqları evdə baş vermiş yanğından sonra aşkar olunub. Faktla bağlı Xaçmaz Rayon Prokurorluğunda cinayət işi başlanılıb.
Cinayət işi üzrə hadisə yerinə və meyitlərə baxış keçirilib, məhkəmə-tibb, məhkəmə-genetik, məhkəmə tikinti-texniki, məhkəmə fiziki-kimyəvi və digər ekspertizalar təyin edilib. Bundan əlavə, tədqiqat üçün 600 nəfərə yaxın şəxsdən zəruri nümunələr götürülüb. İstintaqla müəyyən edilib ki, Ramin Ağaxanov zərərçəkmiş şəxslərə olan xeyli miqdarda pul borcunu ödəməkdən yayınmaq məqsədilə onların yaşadığı evə gələrək onları qəsdən öldürüb, cinayət əməlini gizlətmək və izləri məhv etmək üçün evi qəsdən yandıraraq hadisə yerini tərk edib.
Sumqayıt Ağır Cinayətlər Məhkəməsinin hökmü ilə Ramin Ağaxanov ömürlük azadlıqdan məhrum edilib. Sumqayıt Apellyasiya Məhkəməsinin qərarı ilə şikayət təmin edilməyib.
