AFFA tərəfindən ömürlük futboldan kənarlaşdırılan "Şamaxı"nın sabiq müdafiəçisi Adil Nağıyevin danışılmış oyunlarda iştirakı rəsmən təsdiqlənib.
Teleqraf.com-un məlumatına görə, Nağıyev komanda yoldaşı Giorgi Kantariya ilə birlikdə Premyer Liqadakı "Şamaxı" – "Kəpəz" və Azərbaycan kubokundakı "Zirə" – "Şamaxı" matçlarının nəticələrini manipulyasiya edib. Futbolçular əvvəlcədən komandasının məğlubiyyətinə mərc edərək meydanda qəsdən səhvlərə yol veriblər.
İstintaq müəyyən edib ki, Nağıyev yüksək məbləğli mərc üçün Rusiyada yaşayan Orxan adlı şəxsdən istifadə edib. Məqsəd 50 min manatlıq qoyuluşla yüksək qazanc əldə etmək olsa da, texniki uyğunsuzluqlar səbəbindən mərc baş tutmayıb və futbolçu pulunu itirib. Manipulyasiya komandadakı legioner Redenoviçin rəhbərliyə təqdim etdiyi yazışmalarla aşkarlanıb.
"Topaz" da Nağıyevin müxtəlif oyunlara ümumilikdə 800 manat yatırdığını və 653 AZN uduş götürdüyünü təsdiqləyib.
Məhkəmənin hökmü ilə Adil Nağıyev 5 il azadlıqdan məhrum edilib, lakin cəza şərti hesab edilərək 1 il sınaq müddəti təyin olunub.
