Şabran sakinləri rayon ərazisində vandalizm hadisələrinin baş verdiyini iddia edirlər.
Shimal.News xəbər verir ki, belə hadisələrin sonuncusu Leyti kəndində baş verib.
Yerli sakin Nusrəddin Abdullayev danışıb ki, sentyabrın 13-də Xəlifə Baba adlanan türbə naməlum şəxs və ya şəxslər tərəfindən qazılıb. Onun sözlərinə görə, bundan 10 gün əvvəl digər qədim məzar da qazılıb. Ötən ilin dekabrında isə həmin ərazidə daha bir neçə qədim qəbir qazılıb.
Sakinlər mənəvi və tarixi əhəmiyyət daşıyan ziyarətgah və məzarlarda belə hadisələrin baş verməsindən narazılıqlarını bildiriblər. Onlar hüquq mühafizə və digər aidiyyəti qurumlara müraciət etdiklərini deyiblər.
"Bu, bizim həm keçmişimizə, həm gələcəyimizə, həm də bugünkü günümüzə ləkədir, böyük təhqirdir", – deyə kənd sakini bildirib.
O, ziyarətgahın qorunmasının vacibliyini vurğulayaraq belə halların qarşısının alınmasına çağırış edib.
