Qusar rayonunda hədə-qorxu ilə tələb etmədə ittiham olunan şəxsə hökm oxunub.
Shimal.News xəbər verir ki, işə Qusar Rayon Məhkəməsində baxılıb.
Hakim Əli Cəlilovun sədrliyi ilə keçirilən prosesdə təqsirləndirilən Afər Əliyeva (ad-soyad şərtidir) Cinayət Məcəlləsinin 182.1-ci maddəsi ilə təqsirli bilinərək 3 il müddətinə azadlıqdan məhrum edilib və məhkəmə zalında həbs olunub.
İttiham aktına görə, təqsirləndirilən şəxs qeyri-rəsmi münasibətdə olduğu 1968-ci il təvəllüdlü zərərçəkmiş Samir Abbasovla (ad-soyad şərtidir) əlaqəsini mobil telefonun videokamerası ilə qeydə alıb. Daha sonra həmin görüntüləri yayacağı ilə hədələyərək zərərçəkmişdən 3500 manat pul tələb edib.
Məhkəmə istintaqı zamanı Afər qismən təqsirini qəbul edib. O bildirib ki, videonu hədə-qorxu məqsədilə göndərməyib və pul tələb etməyib. Onun sözlərinə görə, çəkiliş zərərçəkmişin xahişi ilə aparılıb, tərəflər arasında mübahisə videonun təqdim olunmaması səbəbindən yaranıb. Təqsirləndirilən şəxs yalnız 200–300 manat məbləğində pul istədiyini etiraf etsə də, bunu şantaj məqsədi daşımadığını vurğulayıb.
Materiallarda qeyd olunur ki, Afər Əliyeva 2017-ci ildə ailə həyatı qurub, 2021-ci ildə həyat yoldaşı vəfat etdikdən sonra valideynləri ilə birlikdə Qubada yaşayıb, son 9 ayda isə Qusarda fəaliyyət göstərən kafelərin birində çalışıb. Zərərçəkmiş Samir Abbasovun Bakıda işlədiyi, hadisə zamanı isə istirahət məqsədilə Qusara gəldiyi bildirilir.
