Bakıda taksi sürücüləri arasında baş verən mübahisə bıçaqlanma ilə nəticələnib.
Hadisə ötən ilin aprelində paytaxtın Nəsimi rayonu ərazisində, "Şamaxinka" kimi tanınan ərazidə qeydə alınıb. İstintaq materiallarına görə, Quba rayon sakini, 30 yaşlı Məhəmməd şəxsi münasibətlər zəminində yaranan mübahisə zamanı tanışı Süleyman Hacıyevə bıçaq xəsarətləri yetirib.
Təqsirləndirilən şəxs məhkəmədə bildirib ki, tərəflər arasında narazılıq taksi fəaliyyəti ilə bağlı yaranıb. Onun sözlərinə görə, Qubaya getmək istəyən müştərilərlə bağlı baş verən mübahisədən sonra münasibətlər daha da gərginləşib.
Hadisə günü tərəflər arasında yenidən mübahisə yaranıb. Məhəmməd iddia edib ki, Süleyman əvvəlcə ona yumruq vurub və boğmağa çalışıb. Bu zaman o, üzərində olan bıçaqla zərbə endirib.
Zərərçəkmiş Süleyman da ifadəsində davanın baş verdiyini təsdiqləyib. Onun sözlərinə görə, mübahisə zamanı Məhəmmədi vurub, daha sonra isə bıçaq xəsarəti alıb. Nəticədə bıçaq onun qoluna və ağciyərinə xəsarət yetirib.
Cinayət işinə Bakı Ağır Cinayətlər Məhkəməsində baxılıb. Məhkəmənin hökmü ilə Quba rayon sakini Məhəmməd 5 il 6 ay müddətinə azadlıqdan məhrum edilib. O, cəzasını ciddi rejimli cəzaçəkmə müəssisəsində çəkəcək.
