Quba rayonunun Qonaqkənd kənd sakini, 2009-cu il təvəllüdlü Elçin Elşən oğlu Ağaəliyə xəsarət yetirilməsi ilə bağlı ailəsi ədalətli araşdırma tələb edir.
Teleqraf.com-un məlumatına görə, hadisə ötən ilin 28 iyul tarixində baş verib. İddiaya əsasən, xəsarəti Qonaqkənd sakini Nurəddin Ceyhun oğlu Nurəddinov yetirib.
Məlumata görə, azyaşlı Elçin futbol oyunu zamanı qapıçı olub. Oyun epizodlarının birində topu saxlamaq üçün ayağını uzadarkən Nurəddin Nurəddinov onun sağ ayağının üzərinə tullanıb. Nəticədə Elçinin baldır sümüyü sınıb.
Zərərçəkmişə tibbi yardım göstərilsə də, onun vəziyyətinin ağır olaraq qaldığı bildirilir. Səhhətində yaranan problemlər səbəbindən azyaşlı təhsilini davam etdirə bilmir.
Elçinin babası Əfqan Əliyev istintaqın gedişindən narazı olduğunu bildirib. Onun sözlərinə görə, hadisədən 7–8 ay keçməsinə baxmayaraq, iş üzrə ciddi istintaq hərəkətləri aparılmayıb.
"Aylar keçməsinə baxmayaraq, iş üzrə nəticə yoxdur. Nəvəm 11-ci sinif şagirdidir, lakin aldığı xəsarət səbəbindən məktəbə gedə bilmir", – deyə o qeyd edib.
Şikayətçinin sözlərinə görə, 2025-ci il 8 dekabr tarixində Elmi-Tədqiqat Travmatologiya və Ortopediya İnstitutunda aparılan müayinənin nəticələrinə əsasən, zərərçəkmişin vəziyyəti orta-ağır qiymətləndirilib. Yerimə məhdudiyyəti səbəbindən o, 6 ay müddətinə ev təhsilinə yönləndirilib.
Elçin iki dəfə Quba Rayon Mərkəzi Xəstəxanasında əməliyyat olunub. Onun baldır sümüyünə metal konstruksiya yerləşdirilib.
Şikayətçi hadisə ilə bağlı polisə və prokurorluğa müraciət etdiklərini, lakin istintaqın gedişi barədə məlumat ala bilmədiklərini bildirib. O, Quba rayon prokurorluğuna, Baş Prokurorluğa və Daxili İşlər Nazirliyinə də müraciət etdiyini vurğulayıb.
Ailə zərərçəkmişə mənəvi və psixoloji zərər vurulduğunu bildirərək, günahkar şəxsin məsuliyyətə cəlb olunmasını tələb edir.
