Qubada kafedə çalışan qadın kişi müştəriyə xəsarət yetirib.
Demokrat.az-ın məlumatına görə, hadisə ötən il noyabrın 22-də, şəhərin köhnə avtovağzal adlanan ərazisində qeydə alınıb.
2004-cü il təvəllüdlü Sevda gecə saat 01.00 radələrində tanışı Səlimlə (adlar şərtidir) mübahisə edib. Mübahisə şəxsi münasibətlər zəminində yaranıb.
İddialara görə, Sevda Səlimin üz nahiyəsinə əl və yumruq zərbələri endirib.
Sevda barəsində Cinayət Məcəlləsinin 128-ci maddəsi ilə ittiham irəli sürülüb. O, məhkəmədə özünü təqsirli bilib.
Sevdanın sözlərinə görə, hadisə hesab üstündə yaranan mübahisə zamanı baş verib. Müştəri hesabın çox olduğunu deyib və ödəyə bilmədiyini bildirib.
Bu zaman tərəflər arasında mübahisə böyüyüb. Qadın bildirib ki, qarşı tərəf ona nalayiq ifadələr işlədib və o da əsəbiləşərək Səlimə zərbə endirib.
Qarşı tərəfin də ona fiziki müdaxilə etdiyi qeyd olunur. Tərəfləri isə kafedə olan digər əməkdaş ayırıb.
Məhkəmə zamanı tərəflər barışıb. Zərərçəkən şikayətini geri götürüb.
Nəticədə məhkəmə cinayət təqibinə xitam verib və Sevda məsuliyyətdən azad olunub.
