Qubada ailə münaqişəsi zamanı baş verən hadisə diqqət çəkib. Adi bir telefon danışığı sonda şiddətlə nəticələnib.
Demokrat.az-ın məlumatına görə, hadisə bu il yanvarın 14-də rayonun kəndlərindən birində baş verib. 1986-cı il təvəllüdlü kişi axşam saatlarında evdə həyat yoldaşı ilə mübahisə edib. Mübahisə zamanı o, qadına müxtəlif nahiyələrdən zərbələr endirib.
Onun sözlərinə görə, hadisə həyat yoldaşının xaricdə yaşayan qardaşı ilə telefon danışığından sonra başlayıb. Bildirilir ki, danışıq zamanı qarşı tərəfin təhqiramiz ifadələri mübahisəyə səbəb olub. Onun sözlərinə görə, qadının qardaşı danışıq zamanı kişinin vəfat etmiş valideynlərini təhqir edib.
Zərərçəkmiş qadın isə qeyd edib ki, son vaxtlar ailədə tez-tez mübahisələr yaşanırdı. Onun sözlərinə görə, həyat yoldaşı hadisə zamanı spirtli içkinin təsiri altında olub və onu döyüb.
Hadisədən sonra tərəflər barışıb. Zərərçəkmiş şəxs şikayətçi olmadığını bildirib.
Məhkəmə bu məqamları nəzərə alaraq cinayət təqibinə xitam verib və təqsirləndirilən şəxs məsuliyyətdən azad olunub.
