Quba rayonunda ailə münaqişəsi zəminində 1990-cı il təvəllüdlü Telman həyat yoldaşı Gülnarəyə (adlar şərtidir) xəsarət yetirib.
Demokrat.az-ın məlumatına görə, hadisə ötən ilin yanvarın 6-da rayonun kəndlərindən birində qeydə alınıb.
Mübahisə zamanı Telman həyat yoldaşının baş nahiyəsinə zərbə endirib və ona müxtəlif dərəcəli bədən xəsarətləri yetirib.
Faktla bağlı ona Cinayət Məcəlləsinin 128-ci maddəsi ilə ittiham elan olunub. Təqsirləndirilən şəxs məhkəmədə özünü qismən təqsirli bildiyini deyib.
Telman bildirib ki, arvadına yalnız bir dəfə şillə vurub və əməlindən peşmandır.
O, həmçinin qadının digər xəsarətləri yıxılma nəticəsində aldığını iddia edib.
Zərərçəkmiş Gülnarə isə ifadəsində fərqli məqamlar səsləndirib. Qadın bildirib ki, evliliklərinin ilk vaxtlarından münasibətləri gərgin olub və dəfələrlə zorakılığa məruz qalıb.
Gülnarənin sözlərinə görə, hamilə olduğu dövrdə də döyülüb. Bu isə bətnindəki uşağın sağlamlığına ciddi təsir edib. Uşaq ürək qüsuru ilə doğulub və sonradan həyatını itirib.
O, həmçinin bildirib ki, son hadisə zamanı yenidən döyülüb və bu səbəbdən hamiləliyi pozulub.
Hadisədən sonra Gülnarə xəstəxanaya müraciət edib və daha sonra hüquq-mühafizə orqanlarına şikayət edib.
Məhkəmənin qərarına əsasən, Telman barəsində amnistiya tətbiq olunub. Cinayət təqibinə xitam verilib və o, məsuliyyətdən azad edilib.
