Quba rayonunda ər-arvad arasında yaranan mübahisə cinayətlə nəticələnib.
Demokrat.az-ın məlumatına görə, hadisə ötən il sentyabrın 10-da Quba şəhərinin Gənclər küçəsində baş verib. 1978-ci il təvəllüdlü Əhliman həmin gün saat 16 radələrində yaşadıqları məhəllədə idarə etdiyi "Toyota Prius" markalı nəqliyyat vasitəsinin salonunda aralarında yaranan mübahisə zamanı həyat yoldaşı İradənin (adlar şərtidir - red.) üz nahiyəsinə yumruq, sol ayaq nahiyəsinə isə təpiklə zərbələr endirib.
Hadisəni törədən Əhlimanın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən Əhliman ona elan olunmuş ittiham üzrə özünü təqsirli bilib. O, ifadəsində bildirib ki, barəsində şikayət edən zərərçəkmiş İradə onun həyat yoldaşıdır:
"Biz 10 ilə yaxın müddətdir evliyik, iki övladımız var. Bu vaxta qədər həyat yoldaşımla aramızda hər hansı xoşagəlməz hal baş verməyib. Sadəcə son zamanlar maddi vəziyyətim yaxşı olmadığı üçün tez-tez mübahisələrimiz yaranıb. Hadisə günü saat təqribən 16 radələrində idarə etdiyim nəqliyyat vasitəsi ilə yaşadığım evin qarşısında olarkən həyat yoldaşımla aramızda şəxsi münasibətlər zəminində mübahisə yarandı. Mübahisə zamanı onun sol qol nahiyəsindən tutaraq sıxdım. Həmin vaxt İradə qışqırdığı üçün onun ağız nahiyəsindən yumruq zərbəsi ilə vurdum. Daha sonra onun sakitləşmədiyini gördüm və maşından düşməsi üçün şərait yaratdım".
Bu cinayət işinə Quba Rayon Məhkəməsində baxılıb. Məhkəmədə məlum olub ki, təqsirləndirilən şəxs zərərçəkmişlə barışıq əldə edib.
Məhkəmənin hökmü ilə Cinayət Məcəlləsinin 73.2-ci maddəsinə əsasən təqsirləndirilən şəxs barəsində olan cinayət işinə xitam verilib və o, cinayət məsuliyyətindən azad edilib.
