Qubada 8 il əvvəl törədilmiş qətl hadisəsi ilə bağlı təqsirləndirilən Əflatun Əspəndiyev barəsində çıxarılmış hökmdən kassasiya şikayəti verilib.
Pravda.az-ın məlumatına görə, hazırda şikayət Ali Məhkəmədə araşdırılacaq.
Qeyd edək ki, 2017-ci ildə Quba rayonunun Küpçalqışlar kəndi ərazisində, Qudyalçayın üzərində yerləşən körpünün altında yandırılmış "VAZ-2106" markalı avtomobilin içərisində Xaçmaz rayon sakinləri - 1984-cü il təvəllüdlü Rəhman İşıqov və 1998-ci il təvəllüdlü Ülviyyə Məmmədovaya məxsus yanmış meyitlər aşkar edilib. Faktla bağlı Cinayət Məcəlləsinin müvafiq maddəsi ilə cinayət işi başlanıb, istintaq aparılsa da, cinayəti törətmiş şəxs və ya şəxslərin müəyyən edilməsi mümkün olmadığından iş üzrə icraat dayandırılıb.
Baş Prokurorluğun İstintaq İdarəsi tərəfindən cinayət işi yenidən öyrənildikdən sonra 2022-ci ildə iş üzrə dayandırılmış icraat bərpa edilib. Həyata keçirilən çoxsaylı istintaq və əməliyyat-axtarış tədbirləri nəticəsində Xaçmaz rayon sakini, 1994-cü il təvəllüdlü Osman Ömərovun 6 iyul 2017-ci ildən 7 iyul 2017-ci ilə keçən gecə Ülviyyə Məmmədova və Rəhman İşıqovla yaşadığı kəndin ərazisində görüşdüyü, aralarında yaranan mübahisə zamanı Ülviyyə Məmmədovanı deşici alətlə yaraladığı, daha sonra Rəhman İşıqovla baş verən mübahisə zamanı üzərində gəzdirdiyi bıçaqla onun bədəninin müxtəlif nahiyələrinə xəsarətlər yetirdiyi müəyyən edilib.
Bundan sonra cinayətin izlərini itirmək və yol-nəqliyyat hadisəsi görüntüsü yaratmaq məqsədilə Ülviyyə Məmmədova və Rəhman İşıqovun meyitlərini sonuncuya məxsus avtomobilin içərisində Qudyalçayın üzərindəki körpünün altında yandırmasına əsaslı şübhələr yaranıb.
İstintaq zamanı Osman Ömərovun törətdiyi cinayətdə 1987-ci il təvəllüdlü Əflatun Əspəndiyevin də ona kömək etdiyi məlum olub və onun barəsində də həbs qətimkan tədbiri seçilib. Toplanmış sübutlar əsasında Osman Ömərov 19 may 2022-ci il tarixdə Cinayət Məcəlləsinin müvafiq maddələri ilə təqsirləndirilən şəxs qismində cəlb edilib.
Sumqayıt Ağır Cinayətlər Məhkəməsinin hökmü ilə Osman Ömərov ömürlük azadlıqdan məhrum edilib, Əflatun Əspəndiyev isə 18 il müddətinə azadlıqdan məhrumetmə cəzasına məhkum olunub.
