Qubada əmək müqaviləsi bağlamadan işçiləri işlətməkdə və vəzifə səlahiyyətlərindən sui-istifadədə təqsirləndirilən şəxsin cinayət işi üzrə hökm oxunub.
Pravda.az-ın məlumatına görə, Quba Rayon Məhkəməsində hakim Samir Məmmədovun sədrliyi ilə keçirilən prosesdə şirkət direktorlarından biri olan Nağı Baxışzadə (adı şərtidir) 2 il 6 ay müddətinə azadlığın məhdudlaşdırılması cəzasına məhkum edilib və ona elektron qolbaq tətbiq olunub.
İttihama əsasən, o, 2019-cu ilin iyul ayından 2023-cü ilin noyabr ayınadək olan müddətdə 41 nəfəri əmək müqaviləsi bağlamadan rayonun Dəlləkli kəndində yerləşən müəssisədə müxtəlif işlərə cəlb edib. Nəticədə işçilərin əmək hüquqları pozulub və onlar sosial təminat, məzuniyyət və sığorta kimi hüquqlardan məhrum olublar.
Araşdırma zamanı məlum olub ki, qanunsuz hərəkətlər nəticəsində 14.877 manat məbləğində zərər yaranıb.
Məhkəmə təqsirləndirilən şəxsin əməlini Cinayət Məcəlləsinin 162-1.1 və 308.1-ci maddələri ilə cinayət əməli kimi qiymətləndirərək hökm çıxarıb.
