Qubada 19 yaşlı oğlan 8-ci sinifdə oxuyan qıza seksual hərəkətlər edib.
Shimal.News-un məlumatına görə, hadisə ötən ilin fevral ayında, rayonunun Məhəmməd Əcəmi küçəsində qeydə alınıb.
Məhkəmədə ifadə verən təqsirləndirilən Elxan ittiham üzrə özünü təqsirli bilib. O bildirib ki, dostunun vasitəsilə 2024-cü ilin iyulunda Aysel ilə tanış olub. Əvvəlcə sosial şəbəkələrdə yazışan tərəflər arasında sonradan sevgi münasibəti yaranıb. Təqsirləndirilən şəxs qızın 13 yaşının tamam olduğunu və 8-ci sinifdə oxuduğunu bildiyini deyib.
Onun sözlərinə görə, onlar mütəmadi olaraq telefonla danışıb, şəhərdə və parklarda görüşüblər. 2025-ci ilin fevralında isə dərsdən sonra məktəbin yaxınlığında görüşərək söhbət etmək üçün Quba şəhərində yerləşən yarımçıq tikiliyə gediblər. Bir müddət sonra o, qızın razılığı ilə ona yaxınlaşaraq seksual xarakterli hərəkətlər edib.
Zərərçəkmiş Aysel də bildirib ki, həmin hadisədən sonra bir müddət təqsirləndirilən şəxslə telefon əlaqəsini davam etdirib, lakin görüşməyib. Daha sonra onlar yenidən görüşüblər. Dərsə getmədiyi üçün polis əməkdaşları onları Quba şəhərində aşkarlayaraq polis şöbəsinə aparıb. Zərərçəkmiş şəxs məhkəmədə təqsirləndirilən şəxslə cinsi əlaqədə olmadığını, hadisə zamanı ona qarşı zor tətbiq edilmədiyini vurğulayıb.
Quba Rayon Məhkəməsinin yekun qərarı ilə Elxan təqsirli bilinərək 2 il müddətə azadlıqdan məhrumetmə cəzasına məhkum olunub. Qeyd edək ki, adlar şərti verilib.
Əsmər Sənani
