Qusar rayonunda qayınata ilə kürəkən arasında baş verən mübahisə ağır xəsarətlə nəticələnib.
Qafqazinfo.az-ın məlumatına görə, hadisə rayonun Atlıxan kəndində qeydə alınıb. 1961-ci il təvəllüdlü Fərhad Hacımuradov (şərti) kürəkəni Vüsalın qarın nahiyəsinə təpiklə zərbə endirib. Nəticədə zərərçəkənin bağırsağı zədələnib, o, təcili xəstəxanaya çatdırılaraq əməliyyat olunub.
Hadisə gecə saat 02:00 radələrində baş verib. Qayınata kürəkəninin mütəmadi spirtli içki qəbul etməsi və qızı ilə əsassız mübahisələr yaratması ilə bağlı iradını bildirmək üçün onun yaşadığı evə gəlib. Bu zaman tərəflər arasında mübahisə yaranıb və kürəkənin qayınatasını təhqir etməsi qarşıdurmanı daha da gərginləşdirib. Nəticədə kişi qızının ərinə təpiklə zərbə vuraraq ona ağır xəsarət yetirib.
Faktla bağlı F.Hacımuradov barəsində Cinayət Məcəlləsinin 126.1-ci maddəsi (qəsdən sağlamlığa ağır zərər vurma) ilə cinayət işi açılıb. Lakin qarşı tərəf şikayətçi olmayıb.
İşə Sumqayıt Ağır Cinayətlər Məhkəməsində baxılıb və məhkəmənin hökmü ilə təqsirləndirilən şəxsə şərti cəza verilib.
