Qəbələdə sərxoş vəziyyətdə ictimai asayişi kobud şəkildə pozan rayon sakini inzibati qaydada həbs edilib.
1997-ci il təvəllüdlü Cəbrayıl Daşdəmirov (ad-soyad şərtidir) evdə spirtli içki qəbul etdikdən sonra şəhərə gəzməyə çıxıb. Marketdən yenidən spirtli içki almaq istəyərkən cibindəki 50-60 manatın itdiyini zənn edərək Daxili İşlər Nazirliyinin 102 xidmətinə zəng edib.
Lakin sonradan pulun telefonunun arxasında olduğunu aşkar edib.
Polis əməkdaşları müraciətin araşdırılması üçün onu Qəbələ Rayon Polis Şöbəsinə dəvət etsələr də, o, şöbəyə daxil olmaqdan imtina edib, nalayiq ifadələr işlədərək ictimai asayişi pozub.
Qəbələ Rayon Məhkəməsində keçirilən iclasda şəxs əməlini etiraf edib və barəsində cərimə tətbiq olunmasını xahiş edib. Məhkəmə isə onu 7 sutka inzibati həbs cəzasına məhkum edib.
Mənbə: Musavat.com
