Zaqatala rayonunda 35 yaşlı kişi həyat yoldaşını öldürməklə hədələyib və ona bıçaqla xəsarət yetirib.
Demokrat.az-ın məlumatına görə, rayon sakini, 1990-cı il təvəllüdlü Yunis iyulun 16-dan 18-dək müxtəlif vaxtlarda arvadı Səbinəyə (adlar şərti verilib – red.) "WhatsApp" vasitəsilə onu öldürəcəyi barədə səsli və yazılı mesajlar göndərib.
İyulun 18-də, saat 20:00 radələrində isə Yunis Balakən rayonunda anasının yaşadığı evin yanında qısqanclıq zəminində Səbinəyə mətbəx bıçağı ilə iki zərbə vurub. Qadın müxtəlif dərəcəli bədən xəsarətləri alıb.
Hadisə ilə bağlı Yunisə Cinayət Məcəlləsinin 128-ci (qəsdən sağlamlığa zərər vurma) və 134-cü (öldürməklə və ya sağlamlığa ağır zərər vurmaqla hədələmə) maddələri üzrə ittiham elan edilib.
Cinayət işi Balakən Rayon Məhkəməsində araşdırılıb. Məhkəmədə məlum olub ki, ər-arvad arasında barışıq əldə olunub. Zərərçəkən qadın ərini bağışlayaraq şikayətini geri götürüb.
Məhkəmənin hökmünə əsasən, Cinayət Məcəlləsinin 73.2-ci maddəsi tətbiq olunub və Yunis cinayət məsuliyyətindən azad edilib.
