Azərbaycana qayıqla 328 kq qadağan olunmuş maddəni keçirməkdə təqsirləndirilən 3 İran vətəndaşının məhkəməsi başlayıb.
Shimal.News xəbər verir ki, Sumqayıt Ağır Cinayətlər Məhkəməsində hakim Tariyel Quliyevin sədrliyi ilə keçirilən ilk iclasda təqsirləndirilən şəxslərin anket məlumatları dəqiqləşdirilib. Cinayət işi məhkəmə baxışına verilib, növbəti iclas iyunun 23-nə təyin olunub.
İttihama görə, İran vətəndaşları Məxtumi Sadiq Arazqurban oğlu, Atcani Taher Halət oğlu və Qanqırme Omid Çalce oğlu satış məqsədilə 45 kiloqramdan çox qurudulmuş və 328 kiloqramdan artıq qurudulmamış marixuananı "Layner" tipli qayıqla Xəzər dənizi vasitəsilə Azərbaycana keçirməyə cəhd ediblər.
Bildirilir ki, onlar Xaçmaz sahillərinə yaxınlaşarkən sərhədçilər tərəfindən aşkar olunacaqlarını anlayaraq həmin vasitələri dənizə atıblar. Sonradan keçirilən əməliyyat tədbirləri nəticəsində vasitələr sahilboyu ərazilərdə aşkar edilərək götürülüb.
Təqsirləndirilən şəxslər qaçaqmalçılıq, külli miqdarda qadağan olunmuş vasitələrin qanunsuz dövriyyəsi və dövlət sərhədini qanunsuz keçmə maddələri ilə ittiham olunurlar. Onların barəsində həbs qətimkan tədbiri seçilib.
