Qəbələ Rayon İcra Hakimiyyətində qəbul zamanı baş verən insidentlə bağlı vətəndaş inzibati qaydada həbs olunub.
Qafqazinfo.az-ın məlumatına görə, hadisə ötən həftə RİH-in inzibati binasında qeydə alınıb. İşsiz olduğu üçün qəbula yazılan Soltannuxa kənd sakini, 1968-ci il təvəllüdlü S.Məmmədov (şərti soyadlı) ilə icra başçısının müavini Arif Abdullayev arasında mübahisə yaranıb. Tərəflər RİH əməkdaşları tərəfindən ayrılıb. S.Məmmədov polis tərəfindən saxlanılaraq RPŞ-yə aparılıb və barəsində İnzibati Xətalar Məcəlləsinin 510-cu (xırda xuliqanlıq) maddəsi ilə protokol tərtib olunub.
Tərtib edilmiş aktda qeyd edilib ki, S.Məmmədov əsassız ittihamlar səsləndirib, yüksək səs tonu ilə digər vətəndaşlara mane olub və Arif Abdullayevə əl-qol atmağa cəhd göstərib.
S.Məmmədov isə ifadəsində insidentə icra başçısı müavininin səbəb olduğunu iddia edib. O, işə düzəlmək məqsədi ilə qəbula gəldiyini, lakin Arif Abdullayevin ona hücum etdiyini bildirib.
Qəbələ Rayon Məhkəməsinin qərarına əsasən, S.Məmmədov 10 sutka inzibati həbsə məhkum edilib.
