Şəki Apellyasiya Məhkəməsində qəsdən sağlamlığa ağır zərər vurmaqda təqsirləndirilən Coşqun Məhərrəmov (ad və soyad şərtidir) barəsində çıxarılmış hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın məlumatına görə, hakim Zamin Tahirovun sədrliyi ilə keçirilən prosesdə qərar elan edilib.
Qərara əsasən, apellyasiya şikayəti təmin edilməyib.
İttihama görə, hadisə 30 iyun 2024-cü il tarixində saat 23:00 radələrində Qax rayonunun Qaşqaçay kəndində baş verib.
Belə ki, 1969-cu il təvəllüdlü Coşqun Məhərrəmov mərhum atasına məxsus evin yataq otağında qardaşı, zərərçəkmiş Cəbrayıl Məhərrəmovla (ad və soyad şərtidir) mübahisə edib. Mübahisəyə səbəb atasına məxsus evlə bağlı məsələ olub. Bu zaman Coşqun Məhərrəmov əsəbiləşərək əlində olan armaturla qardaşının sol qabırğa və sol çiyin nahiyələrinə qəsdən zərbələr endirib. Zərbələrin təsirindən Cəbrayıl Məhərrəmov yerə yıxılıb.
Daha sonra Coşqun Məhərrəmov qardaşının bədəninin müxtəlif nahiyələrinə çoxsaylı təpik zərbələri vurub, əli ilə boğazından tutaraq sıxıb və nəticədə onun sağlamlığına ağır zərər yetirib.
Hadisədən sonra Coşqun Məhərrəmov saxlanılıb və barəsində həbs qətimkan tədbiri seçilib.
Şəki Ağır Cinayətlər Məhkəməsinin hökmü ilə Coşqun Məhərrəmov 3 il 6 ay müddətinə azadlıqdan məhrum edilib.
