Abşeron rayonunda ər arvadını bıçaqlayıb, sonra özünü öldürüb.
Hadisə avqustun 3-ü səhər saatlarında Xırdalan şəhərinin Mehdi Hüseynzadə küçəsində yerləşən mənzildə baş verib.
İlkin məlumata görə, Zaqatala sakini, 1972-ci il təvəllüdlü Tərlan İbrahimov 1978-ci il təvəllüdlü həyat yoldaşı Günəş İbrahimovaya bıçaqla çoxsaylı xəsarətlər yetirib. Daha sonra o, özünə də bıçaqla xəsarət yetirərək həyatına son qoyub.
Hadisə ilə bağlı Shimal.News-un sorğusuna cavab olaraq TƏBİB-dən bildirilib ki, 03.08.2026-cı il tarixində saat 07:50 radələrində Respublika Təcili və Təxirəsalınmaz Tibbi Yardım Mərkəzinə Abşeron rayonu, Xırdalan şəhəri, M. Hüseynzadə küçəsi ərazisindən çağırış daxil olub.
"Çağırış ünvanına təcili tibbi yardım briqadası cəlb edilib. Briqada tərəfindən bir nəfərin (kişi) həkiməqədər ölüm faktı qeydə alınıb.
Qadın isə Abşeron Rayon Mərkəzi Xəstəxanasına hospitalizasiya olunub. Ona boyun nahiyəsinin, başın, döş qəfəsinin, saidin, çiyin və bazu nahiyələrinin açıq və çoxsaylı yaraları, həmçinin qarın divarının kontuziyası diaqnozları təyin edilib. Vəziyyəti orta ağır qiymətləndirilən pasiyentə müvafiq laborator və instrumental müayinələr aparıldıqdan sonra cərrahi əməliyyat icra olunub".
Faktla bağlı Abşeron Rayon Prokurorluğunda cinayət işi başlanılıb, istintaq aparılır.
