Şəki Ağır Cinayətlər Məhkəməsində ölümlə nəticələnən yol qəzası ilə bağlı cinayət işi üzrə hökm elan edilib.
Pravda.az-ın məlumatına görə, hakim Xaliq Məmmədovun sədrliyi ilə keçirilən prosesdə təqsirləndirilən Polad Ağababayev 5 il müddətinə azadlıqdan məhrum edilib. O, cəzasını məntəqə tipli cəzaçəkmə müəssisəsində çəkəcək.
İstintaqla müəyyən olunub ki, hadisə 31 avqust 2025-ci il tarixində, saat 16 radələrində Ağdaş–Zarağan magistral yolunun Qəbələ rayonunun Soltannuxa kəndi ərazisindən keçən hissəsində baş verib. Polad Ağababayev sərxoş vəziyyətdə və sürücülük hüququ olmadan idarə etdiyi "Opel Astra" markalı avtomobillə hərəkətdə olarkən idarəetməni itirib və maşın aşıb.
Qəza nəticəsində sürücü xəsarət alsa da, onun 11 yaşlı oğlu aldığı ağır xəsarətlərdən hadisə yerində həyatını itirib.
Hadisədən dərhal sonra saxlanılan Polad Ağababayev barəsində cinayət işi başlanıb və məhkəmənin hökmü ilə o, həbs cəzasına məhkum edilib.
