Zaqatala rayon sakini Zaur İsmayılovun dələduzluq işi üzrə məhkəmə prosesi davam edir. Məlumata görə, o, bankda çalışdığı dövrdə "makler" kimi tanınan İsa Abdullayevlə tanış olub və onun vasitəsilə əmlak alqı-satqısı məqsədilə müxtəlif mənbələrdən topladığı təxminən 500 min manatı ona verib. Sonradan İsmayılov pulların mənimsənildiyini və heç bir əmlak alınmadığını iddia edərək DİN-ə müraciət edib.
İsa Abdullayev isə əksinə, Zaur İsmayılovun ondan 81 min manat aldığını bildirərək Baş Prokurorluğa şikayət edib. Bu şikayət əsasında Zaur İsmayılov barəsində cinayət işi açılıb və Şəki Ağır Cinayətlər Məhkəməsinin hökmü ilə o, 5 il 6 ay müddətinə azadlıqdan məhrum edilib. Apellyasiya şikayəti də təmin olunmayıb.
Lakin Ali Məhkəmə kassasiya şikayətini qismən təmin edərək, İsmayılovun ittihamı üçün kifayət qədər sübut olmadığını əsas gətirib, apellyasiya qərarını ləğv edib və işi yenidən baxılması üçün Şəki Apellyasiya Məhkəməsinə göndərib.
Hazırda iş apellyasiya mərhələsində yenidən araşdırılır. Vəkil Yalçın Hacızadənin sözlərinə görə, zərərçəkən kimi tanınan İsa Abdullayev ziddiyyətli ifadələr verib və bu da ittihamın əsassız olduğunu göstərir. Müdafiə tərəfi Zaur İsmayılova bəraət verilməsi üçün kifayət qədər əsasların olduğunu bildirir.
